【政治SOUND】特首高官齊撐場 民建聯晚會籌半億

民建聯兩年一度嘅籌款晚會昨晚喺灣仔會展舉行,主題係「全賴有您」,超過900位高官及社會賢達到賀,包括行政長官林鄭月娥、全國政協副主席梁振英、外交部駐香港特派員公署副特派員楊義瑞、中聯辦副主任何靖等,星光熠熠。

 

主席李慧琼致辭時話,有朋友同佢講,今日其實都係投票日,因為支持民建聯,所以會投下「鈔票」。佢形容陳凱欣當選都係多得大家,令立法會增添多一份力量,希望大家繼續支持民建聯。

 

晚會其中一個高潮係三位前局長,前食物及衞生局局長高永文、前政制及內地事務局局長譚志源同民建聯會務顧問蘇錦樑三人大跳K-POP,現場氣氛熱鬧,一眾嘉賓亦睇得好高興,前特首梁振英仲舉起手機影相,特首林鄭月娥亦睇到拍晒手掌。

 

籌款晚會得到社會各界鼎力支持和贊助,節目豐富,主席李慧琼獨唱《中國夢》,副主席張國鈞同周浩鼎合唱《壯志驕陽》,中聯辦副主任何靖同前人大代表張明敏亦合唱《我的中國心》籌款;至於在拍賣環節,全國政協常委、世茂集團主席許榮茂以1000萬元投得饒宗頤墨寶「量寬福厚」,香港旭日集團董事長楊釗亦以600萬元投得莫言書法一幅,今年合共籌得約五千萬元。

 

主席李慧琼話民建聯會展望未來,努力推動香港聚焦發展,把握機遇,融入國家發展大局,積極參與「一帶一路」和粵港澳大灣區建設,為香港和國家發展發揮更大作用。

Category:

政治18, 政治SOUND