【政治SOUND】王桂壎轉場籌款 高歌助興

香港律師會前會長王桂壎(Huen)鍾意夾Band好多人都知,過往幾年都同一班老友去油麻地廟街街頭表演做善事,今年就轉移陣地,去到HKBC Media總部,聯同城中一班音樂造詣非凡嘅專業人士,舉行籌款表演派對,籌款數字更創歷來新高,Huen更與Law Society VIP樂隊成員合奏多首金曲,全晚氣氛高漲,個個聽出耳油。

 

今次已經係王桂壎第四年參與呢個籌款表演活動,佢太太May更一早嚟捧場同打點,更幫手招呼客人滿場飛,佢笑言係Huen嘅助手,名副其實「夫唱婦隨」。彈得一手好結他嘅王桂壎話,佢細個讀男校,個個男仔都爭住學音樂扮型追女仔,佢自己仲苦練彈結他,依家學以致用,娛人娛己兼且做善事,好滿足又有意義。

 

王桂壎太太May除咗係賢內助之外,仲係唱得之人,佢唱咗《明天會更好》等多首經典名曲,唱完之後全場都拍晒手掌。一首《YMCA》更帶起全場高潮,大家都一齊歡呼拍掌、聞歌起舞,場面壯觀。

 

Huen話今年轉左去HKBC Media 總部舉行籌款表演,少咗好多煩惱,因為音響設備齊全、地方大、私隱度高又唔怕俾人騷擾,一班朋友可以唱得更投入、更開心。為咗答謝一眾好友捧場支持籌款,佢為全場送上一首《Stand by me》,感激好友無時無刻都在佢身邊支持佢,話感激不盡,一切在心中!

Category:

政治18, 政治SOUND